نئی دہلی:14/مئی (ایس اونیوز /آئی این ایس انڈیا)پبلک سیکٹرکے آئی ڈی بی آئی بینک کے افسران اور ملازمین نے اجرت میں نظر ثانی کے مطالبہ پر 16 مئی سے چار روزہ ہڑتال کا اعلان کیا ہے۔آل انڈیا آئی ڈی بی آئی ملازم تنظیم اور آل انڈیا افسران تنظیم نے آج یہ اطلاع دی کہ آئی ڈی بی آئی افسران اور ملازمین کی مشترکہ پلیٹ فارم کے بینر تلے اس ہڑتال کا فیصلہ کیا گیا ہے۔قابل ذکر ہے کہ بینک کے انتظامیہ اورآئی ڈی بی آئی افسران کی تنظیم کے نمائندوں کے درمیان گذشتہ آٹھ اور نو مارچ کو میٹنگ میں ہوئی تھی جس میں نومبر2012سے زیرِالتواتنخواہ میں اضافہ کے سلسلے میں بات چیت کامیاب رہی تھی۔